مين هو دوناتيلو ؟؟؟

دوناتيلو ده سينيور ديفيلوبر. ساقني القدر اني اشتغل معاه غالبا للتكفير عن سيئاتي.

مع انه شخص حقيقي انا غيرت اسمه عشان هو مش شخص بس، هو فكرة.

في فترة شغلي معاه، دخلت في حوارات، ستر ربنا اني كنت خلفت قبليها و اكتفيت.

قررت للمفارقة اسميه دوناتيلو على غرار صاحبنا دوناتيلو بتاع سلاحف النينجا - مع انه عكسه تماما.

يعني دوناتيلو بتاع سلاحف النينجا ذكي، مش بيقاوح كتير، مش بيهري في الزبادي ومش بيعمل البحر طحينة عشان يوقف المراكب السايرة.

اما دوناتيلو بتاعنا لو سألته مثلا: أروح الإسكندرية ازاي من القاهرة؟ حيقول لك:

د : انت تركب اوتوبيس شرق الدلتا للغردقة و من هناك تاخد عبارة للسعودية، و تركب عربية 4x4 للشارقة. من هناك تحجز تذكرة طيارة economy للأسكندربة عشان التذكرة بتاعت رجال الأعمال او الدرجة الأولى بتبقى غالية

م : بس ده حيكلفنا كتير

د : لأ ما احنا حنحجز تذكرة economy. و بعدين انت ايش ضمنك لما نيجي طالعين بالعربية البنزين ما يغلاش فجأة؟؟ 

م : طب ليه اللفة دي كلها؟ 

د : عشان البوابات بتاعت طريق اسكندرية الصحراوي غالية، و بعدين ممكن اوي العربية تتحشر و انت بتعدي. و كمان ممكن السكة تكون زحمة فتتأخر أو يحصل حادثة. و زي ما احنا كلنا عارفين و دي حقيقة مثبوتة، حوادث الطيارات اقل من حوادث العربيات

(ملحوظة: ده طبعا حوار تخيلي، بس مستوحى من روح دوناتيلو النجسة)

اللي بيكلم دوناتيلو ده يبقى انا و الـ"م" دي اختصار مايكل أنجلوا. ليه بقى مايكل أنجلو؟ لسببين:

1 - هو اكتر سلحف نينجا بحبه

2 - الاثنين التانين (رافايل و ليوناردو) عصبين و خلقهم ضيق و معاهم اسلحة بيضا، فأكيد مع اول رد غبي حيغزوه في طيزه

 

انا قررت اترخ محادثاتي معاه دي في ذاكرة الانترنت عشان الاجيال اللي جاية تتعلم منه و ماتعملش زيه. و لو كان حظكم زي حظي و خبطوا في دوناتيلو و اضطريتوا تشتغلوا معاه، ف ابتدوا المدونة بتاعتكم على طول قبل ما تنسوا اللي حيصل فيكم. 

دوناتيلو كان شغال معايا، و اكيد كان شغال معاكم في يوم من الأيام.

دوناتيلو لا يفنى و لكن يستحدث من العدم.
دوناتيلو اسلوب حياة.

دوناتيلو فكرة، فكرة تستاهل الوأد. 

اعانني الله و اياكم على كل دوناتيلو في حياتنا.